از مخمل و ابریشم

۱۳٩۳/٩/۱

ادای دینی به شاعران شهیر کرد
             شاکه و خان منصور 
 
سه‌رده‌واس بانکووڵ! سه‌رده‌واس بانکووڵ!
ئه‌ێ وجاخ کوور ئه‌ێ میلکان چووڵ

ئه‌ێ کیوه‌ێ به‌رزیگ هه تووز و ته‌می
ئه‌و که‌ڵه چه‌نێ وه پیدا نه‌می

ئه‌و که‌ڵ هیول هه‌فده ساڵانه
فرشته‌ێ به‌خت کورده ماڵانه

ئه‌و بریوه پیه‌نه ئه‌و ده‌م چیو قه‌نه
دل له جێ به‌ر دل له جێ که‌نه

ئه‌و گه‌رده‌ن به‌رزه ئه‌و بژانگ شووره
له ژیرو خه‌ن له ژیره‌و نووره

ئه‌و ئه‌بروو پیوه‌ن ئه‌و که‌مان داره
ئه‌و تیر وه‌شن که‌مان ئه‌وشاره

ئه‌و ده‌ێ م ئه‌ل پیچه ئه‌و یه‌قه وازه
ئه‌و بالا به‌رز  که‌مه‌ن درازه

وه قول شاکه ئه‌و وه‌ێ له وه‌ره
ئه‌و گره‌ێ ئاگر له جه‌سه ده‌ره*
 
سخمه‌ێ سکه دووز سه‌وز سوورانی
کونه‌ێ که‌ل پووس گه‌وراێ گوورانی

د ره‌دیف ره‌سن داس له ناو قه‌‌ێێ
گریه‌ێان داگه له بان به‌ێێ

زلفه‌یل لیوولێ خسگه وه شانا
"شکرانم پید بوو که‌س سر نه‌زانا"١

که‌وی گرده‌نی کفتگه ئه‌و ده‌ر
"شکرانم پید بوو بینای بان سه‌ر"٢

خان مه‌سیور ها کوو ئێ که له بیونێ
شاکه کل بکه‌ێ  له شوون و نیونێ

خان مه‌سیور وه‌تم هه‌م که‌فته‌و هیوورم
بیس و چوار ساله له‌ێ شاره  دیوورم

شار مناڵی! شار بازییم
شار سه‌ر به‌رزی و سه‌رفه‌رازییم

شار برایلم شار دووسه‌یلم
شار عشقه‌یلم شار بووسه‌یلم

شار شادی و شار شیوه‌نم
هووره چره‌یل چه‌مه‌ری خوه‌نم

شار شیرینم شار شارانم
مڵک و ماواگه‌ێ جار جارانم

بیس و چوار ساڵه لی شاره نیم
م دی م نیم ئه‌نیو م کیم؟

نه خان مه‌سیوورم نه «میرنه‌ورووزم»**
په‌ره ی بنیوسم له حاڵ و رووزم

ویڵ وه‌یلانێ له‌ێ ناو شاره‌یله
گرفتار ناو گرفتاره‌یله

ته نیاێ بێ که‌س بێ هاو نشینێ
بی ده‌دس بێ پاێ بێ دنیا و دینێ

دار بێ سایه‌ێ  بێ به‌رگ و بار‌ێ
له پای نه نیشتن ئیل و ته بار‌ێ

تیول ئه‌لکه‌نیاگ فره دریاگێ
جار وه‌رهه‌لای یه‌ێ شه‌و خوریاگێ

دار کولوور له ناوه‌و چووڵێ
بار د دنیا له بان کووڵێ

شاکه! یه حال براگه‌ێ تنه
ته‌نیا م نیم گشتێ چیو منه

زه‌یومان سیه و کیوه‌مان که‌وه
که‌سێ نیه‌زانی رووژه یا شه‌وه

هام‌شوو نه‌ێریم بری برانه
سال تاعوونه سال قرانه

له‌ێ ملکه نیه‌خێ مینگه‌نوار‌ێ
ئاسمان ئه‌ور که‌ێ وه‌لی نیه‌وار‌ێ

لافاو که‌فته‌و رێ وه‌لی له ماڵان
نه‌که‌فته‌و بان کووره گڵاڵان***

کووره گڵاڵان کوورو لاڵ مه‌نن
کوورپه مناڵان هه مناڵ مه‌نن

مه‌ر خوداێ ره‌حمان خوه‌‌ێ بکه‌ێ کار‌ێ
تا ئه‌ورێ بایدو تیه‌وێ بوار‌ێ

تیه‌و‌ێ بوارێ دنیا بشورێ
ئێ ته‌پ و تووزه له‌ێره بتوورێ

ئێ شه‌وه زڵفێ بخه‌ێ وه پشتا
خوه‌ر ئڵا‌ێ له بان سه‌ر مانشتا

منی له شار غه‌ریبی بامه‌و
گیا سه‌وز بکه‌ێ وه ده‌م پامه‌و

سووسه‌ن بچرێ ئه‌و سه‌ر نساران
وه تِ مزگانی هاته‌وه یاران****

 
                             ٢۵/٧/٩٣

١و٢ خان مه سیور
*کی گره‌ێ ئاگر له جه سد وه ردا؟
                         خان مه سیور
**شاعر لری گو و مشهور دهلرانی
*** کووره گلالان لافاو گرته وه ر؟
                                  شاکه
****سووسه ن گول چری ئه و سر نساران
        وه ت مزگانی هاته وه یاران
              خان مه سیورو شاکه

بهروز یاسمی
 

[ خانه| آرشيو | پست الكترونيك ]

خانه
آرشيو
پست الكترونيك

پرشين‌بلاگ